Palçıq və parafin tətbiqləri naftalan kursunun dəstəkləyici hissəsidir. Onlar vannanın yerini tutmur — məqsəd istiliyin toxumaya daha uzun müddət saxlanılması və prosedurlar arasındaki fasilələrdə təsirin davam etdirilməsidir.
Parafin terapiyası. Ərimiş parafin nazik qatlarla oynağın və ya əzələnin üzərinə çəkilir və üstü örtülür. Parafin istiliyi tədricən buraxdığı üçün nahiyə uzun müddət isti qalır; bu, əzələ gərginliyinin azalmasına və oynağın hərəkətinin rahatlaşmasına kömək edir. Ən çox əl, ayaq, çiyin və bel nahiyələrində, həmçinin travmadan sonrakı reabilitasiya dövründə tətbiq olunur.
Palçıq tətbiqləri. Müalicəvi palçıq isidilib bədənin müəyyən sahələrinə lokal olaraq qoyulur. Prosedur oynaq və onurğa ilə bağlı şikayətlərdə, həmçinin dəri baxımı proqramlarında istifadə edilir. Palçıq həm ümumi, həm də yalnız bir nahiyəyə tətbiq oluna bilər — bunu həkim təyin edir.
Hər iki prosedur həkim təyinatı ilə və tibbi personalın nəzarəti altında aparılır. Temperatur, qatın qalınlığı və seansın müddəti sizin göstəricilərinizə görə seçilir; qan təzyiqi və ürək-damar sistemi ilə bağlı bəzi hallarda istilik prosedurları məhdudlaşdırıla və ya ümumiyyətlə təyin edilməyə bilər — bu, gəlişdəki müayinə və analizlərdən sonra aydınlaşır.
Kurs planlaşdırılarkən palçıq və parafin naftalan vannası ilə eyni günə salınmır; adətən onlar vanna olmayan günlərdə, fizioterapiya ilə birlikdə cədvələ yazılır. Prosedurdan sonra duş və 20–30 dəqiqəlik istirahət nəzərdə tutulur.
